کراچی: میئر کراچی بیرسٹر مرتضیٰ وہاب نے اعلان کیا ہے کہ شہر کی عوامی تحفظ اور بلدیاتی خدمات کو مزید مؤثر بنانے کے لیے ہر یونین کمیٹی (UC) کو ماہانہ ایک لاکھ روپے فراہم کیے جائیں گے۔ یہ رقم صرف اسٹریٹ لائٹس کی مرمت و بحالی اور مین ہول کورز کی تنصیب یا تبدیلی کے لیے استعمال کی جائے گی۔

میئر کراچی کے مطابق اس اقدام کی باضابطہ منظوری دے دی گئی ہے اور ادائیگی کا آغاز دسمبر سے ہوگا۔ انہوں نے کہا کہ یہ فیصلہ شہر میں ناخوشگوار واقعات کی روک تھام اور مقامی سطح پر بلدیاتی مسائل کے فوری اور مؤثر حل کو یقینی بنانے کے لیے کیا گیا ہے۔

نئے لوکل گورنمنٹ سسٹم کے تحت کراچی میٹروپولیٹن کارپوریشن (KMC)، ٹاؤنز اور یونین کمیٹیاں قائم کی گئی ہیں۔ پہلے ہر UC کو ماہانہ پانچ لاکھ روپے فراہم کیے جا رہے تھے، تاہم متعدد کمیٹیوں نے اسے ناکافی قرار دیا تھا۔ پاکستان پیپلز پارٹی کی قیادت اور سندھ حکومت نے اس درخواست پر نوٹس لیتے ہوئے ہر یونین کمیٹی کا بجٹ بڑھا کر 12 لاکھ روپے ماہانہ کر دیا تھا۔

اب KMC نے فیصلہ کیا ہے کہ ہر یونین کمیٹی کو مزید ایک لاکھ روپے فراہم کیے جائیں گے، جو صرف اسٹریٹ لائٹس کی مرمت اور مین ہول کورز کی ضروریات پر خرچ ہوں گے۔ اگرچہ کراچی واٹر اینڈ سیوریج کارپوریشن (KWSC) اور KMC دونوں کی جانب سے مین ہول کورز فراہم کیے جا رہے ہیں، لیکن شہریوں کی ضروریات کو مدنظر رکھتے ہوئے ایک اضافی قدم اٹھایا گیا ہے۔

یہ رقم میونسپل یوٹیلیٹی چارجز اینڈ ٹیکسز (MUCT) اکاؤنٹ سے جاری کی جائے گی، جس کے بعد ہر UC عوامی شکایات کے فوری حل، محلوں کی انفراسٹرکچر میں بہتری اور ضروری بلدیاتی خدمات زیادہ مؤثر انداز میں فراہم کر سکے گی۔

میئر کراچی بیرسٹر مرتضیٰ وہاب نے کہا کہ کراچی کے شہریوں کی حفاظت اور بہبود ہمیشہ ہماری اولین ترجیح رہی ہے اور یہ فیصلہ ایک محفوظ، روشن اور بہتر منظم کراچی کی جانب اہم قدم ہے۔ انہوں نے مضبوط بلدیاتی نظام کی حمایت پر صوبائی قیادت کا بھی شکریہ ادا کیا