کراچی: بھارت کی جانب سے جاری فلم 'دھرندھر' میں لیاری کے خلاف منفی پروپیگنڈے کے جواب میں پاکستان میں 'میرا لیاری' نامی فلم تیار کر لی گئی ہے۔ فلم کی تیاری میں سندھ حکومت نے معاونت فراہم کی ہے اور یہ جنوری کے پہلے ہفتے میں ریلیز کی جائے گی۔

صوبائی وزیر شرجیل میمن نے کہا کہ فلم کو بین الاقوامی سطح پر بھی پیش کیا جائے گا۔ انہوں نے کہا:

"جنگ میں بھارت کو عبرت ناک شکست ہوئی، وہ فلموں کے ذریعے ہار کو جیت میں نہیں بدل سکتا۔ بھارتی فلم دھرندھر خاص طور پر لیاری کے خلاف منفی پروپیگنڈا ہے۔"

شرجیل میمن نے مزید کہا کہ لیاری تشدد نہیں بلکہ ثقافت، امن، صلاحیت اور حوصلے کی علامت ہے۔ 'میرا لیاری' فلم میں لیاری کے حقیقی چہرے کو دکھایا جائے گا، جس میں امن، خوشحالی اور فخر کی جھلک نظر آئے گی۔

خیال رہے کہ بھارتی فلم 'دھرندھر' میں رنویر سنگھ، اکشے کھنہ، آر مدھون، ارجن رام پال، سنجے دت سمیت دیگر اداکار مرکزی کردار ادا کر رہے ہیں۔ پاکستان میں تیار کی جانے والی فلم 'میرا لیاری' کے ذریعے لیاری کے عوام کی حقیقی کہانی دنیا کے سامنے پیش کی جائے گی۔