ڈیرہ اسماعیل خان: سکیورٹی فورسز نے خفیہ اطلاعات کی بنیاد پر ڈیرہ اسماعیل خان کے علاقے کلاچی میں کامیاب آپریشن کرتے ہوئے 7 خوارج کو ہلاک کر دیا، جبکہ فائرنگ کے تبادلے میں پاک فوج کا ایک جوان شہید ہو گیا۔

آئی ایس پی آر کے مطابق کلاچی کے علاقے میں بھارتی پراکسی فتنہ الخوارج کی موجودگی کی اطلاع پر آپریشن کیا گیا۔ کارروائی کے دوران شدید فائرنگ کا تبادلہ ہوا، جس کے نتیجے میں 7 خوارج مارے گئے۔

آئی ایس پی آر کے بیان میں کہا گیا ہے کہ اس آپریشن کے دوران وطن کے بہادر سپوت نائیک یاسر خان نے جامِ شہادت نوش کیا۔ شہید نائیک یاسر خان کی قربانی کو خراجِ عقیدت پیش کیا گیا ہے۔

بیان کے مطابق مارے گئے خوارج سے اسلحہ اور گولہ بارود بھی برآمد کیا گیا، جبکہ ہلاک دہشتگرد متعدد دہشت گردانہ سرگرمیوں میں ملوث تھے۔

آئی ایس پی آر کا مزید کہنا ہے کہ علاقے میں کسی بھی دوسرے بھارتی اسپانسرڈ خوارج کے خاتمے کے لیے کلیئرنس آپریشن جاری ہے۔ سکیورٹی فورسز اور قانون نافذ کرنے والے ادارے ملک سے غیر ملکی سرپرستی میں دہشت گردی کے ناسور کے مکمل خاتمے کے لیے پرعزم ہیں۔