اسلام آباد: وفاقی وزیر پارلیمانی امور طارق فضل چوہدری نے کہا ہے کہ سابق لیفٹیننٹ جنرل فیض حمید کی سزا کسی حکومت کی سیاسی فتح نہیں بلکہ قانون کی فتح اور آئین کی سربلندی ہے۔ انہوں نے کہا کہ فوج کی تاریخ میں پہلے کبھی ایسی مثال نہیں ملتی، اور یہ فیصلہ ثابت کرتا ہے کہ فوج میں بھی کوئی افسر قانون کی خلاف ورزی کرے تو قانون حرکت میں آئے گا۔

طارق فضل چوہدری نے پریس کانفرنس میں مزید کہا کہ پاکستان تحریک انصاف کے بانی عمران خان اور فیض حمید کا گٹھ جوڑ تھا، اور ان کے الزامات ثابت ہونے پر 14 سال قید بامشقت کی سزا سنائی گئی۔ وفاقی وزیر نے کہا کہ بانی پی ٹی آئی جیل کو پارٹی سیکریٹریٹ کی طرح استعمال کر رہے ہیں اور ریاست و اداروں کے خلاف منفی پروپیگنڈا کر رہے ہیں۔

انہوں نے فیلڈ مارشل عاصم منیر کی قیادت میں پاکستان کی حالیہ جنگ میں کامیابی کو سراہتے ہوئے کہا کہ دنیا میں پاکستان کو منفرد پذیرائی ملی، اور افغانستان کے ساتھ بہتر تعلقات قائم کرنے کی ضرورت ہے۔ وفاقی وزیر نے مزید کہا کہ دہشتگردی کے ذمہ دار افغان عوام نہیں بلکہ افغان رجیم ہیں، اور پاکستان نے چالیس لاکھ مہاجرین کی مہمان نوازی کی ہے۔

طارق فضل چوہدری نے خیبر پختونخوا کے وزیراعلیٰ کے رویے پر بھی تنقید کرتے ہوئے کہا کہ فوجی آپریشن میں جانی نقصان ہوتا ہے، اور فوج کے جوان دہشتگردی کے خلاف قربانیاں دے رہے ہیں۔