اسلام آباد: چیف آف ڈیفنس فورسز فیلڈ مارشل سید عاصم منیر نے کہا ہے کہ 1971 کی جنگ میں پاک بحریہ دشمن کے لیے سمندر میں سیسہ پلائی دیوار تھی اور آج بھی ملکی بحری سرحدوں پر ایک مضبوط اور ناقابل تسخیر دفاعی فصیل موجود ہے۔

یہ بیان پاک بحریہ کی جانب سے 9 دسمبر کو منائے جانے والے "ہنگور ڈے" کے موقع پر دیا گیا، جو آبدوز ہنگور کی بہادری اور پاکستان کے ناقابلِ تسخیر دفاع کی علامت کے طور پر یاد کیا جاتا ہے۔

فیلڈ مارشل عاصم منیر نے کہا کہ پاکستان ہمیشہ اپنی خود مختاری اور دفاع وطن کے لیے پرعزم ہے، اور 9 دسمبر 1971 کو آبدوز ہنگور کے عملے نے شاندار جانبازی کا مظاہرہ کیا،

جس کی داستان آج بھی دشمن کے ذہن پر نقش ہے۔ انہوں نے مزید کہا کہ یہ دن اس بات کا ثبوت ہے کہ پاکستان امن کا خواہاں ہے، مگر دفاع میں کسی بھی قربانی سے گریز نہیں کرتا۔

پاک بحریہ کے نیول چیف ایڈمرل نوید اشرف نے بھی کہا کہ شاندار ماضی کی طرح آج بھی پاک بحریہ دشمن کے لیے "دانت کھٹے کرنے" کے لیے ہمہ وقت تیار ہے۔ انہوں نے بتایا کہ 8 جدید ہنگور کلاس آبدوزیں جلد فلیٹ میں شامل کی جائیں گی۔

ہنگور ڈے کے موقع پر پاک بحریہ کی جانب سے خصوصی دستاویزی فلم "ہدف" بھی جاری کی گئی، جو پاک بحریہ کی بہادری اور دفاع وطن کے جذبے کو خراج تحسین پیش کرتی ہے