اسلام آباد: وزیر دفاع خواجہ آصف نے کہا ہے کہ پاکستان تحریک انصاف (پی ٹی آئی) کے رہنما اینٹی پاکستان بیانیے سے لاتعلقی ظاہر نہیں کر رہے، جو ملک کے خلاف ایک سازش ہے اور بھارت و افغانستان کو خوش کر رہی ہے۔

پارلیمنٹ ہاؤس میں جیو نیوز سے گفتگو کرتے ہوئے خواجہ آصف نے کہا کہ پی ٹی آئی کی قیادت پاکستان کے ساتھ نہیں بلکہ دشمنوں کی صف میں کھڑی ہے۔

انہوں نے بانی پی ٹی آئی کے سوشل میڈیا اکاؤنٹس کی تحقیقات کا حوالہ دیتے ہوئے کہا کہ ان سے اداروں اور افواج کے خلاف بیانیہ تیار کیا جاتا رہا ہے۔

وزیر دفاع نے مزید کہا کہ پاک فوج نے بھارت کو شکست دے کر تاریخ رقم کی ہے، مگر کچھ اکاؤنٹس کی سرگرمیاں ملک کے مفاد کے خلاف جا رہی ہیں۔

انہوں نے کہا، “کیا یہ وہ وقت بھول گئے جب ثاقب نثار اور دیگر نے سپریم کورٹ کو مذاق بنایا تھا؟”

خواجہ آصف کے مطابق پی ٹی آئی کی قیادت کو فوری طور پر اینٹی پاکستان بیانیے سے لاتعلقی ظاہر کرنی چاہیے تاکہ ملک کی سلامتی اور قومی مفاد کو خطرہ نہ ہو۔