راولپنڈی: انسداد دہشتگردی عدالت نے علیمہ خان کے خلاف 26 نومبر کے احتجاج سے متعلق مقدمے کی سماعت میں ان کے 2 ضمانتی مچلکے ضبط کرنے کا حکم دے دیا۔

راولپنڈی کی انسداد دہشتگردی عدالت میں سماعت کے دوران علیمہ خان اور ان کے وکلا پیش نہیں ہوئے، جس پر پراسیکیوٹر نے عدالت سے استدعا کی کہ ملزمہ کے ضمانتی مچلکے ضبط کیے جائیں۔ پراسیکیوٹر کے مطابق علیمہ خان نے عدالت کو یقین دہانی کرائی تھی کہ وہ ہر سماعت میں پیش ہوں گی، مگر عدم حاضری کی وجہ سے عدالت نے مچلکے ضبط کرنے کا حکم جاری کر دیا۔

عدالت نے علیمہ خان کے 10، 10 لاکھ روپے کے 2 ضمانتی مچلکے ضبط کرنے کے علاوہ ان کے قابل ضمانت وارنٹ اور ضمانت منسوخی کے نوٹس بھی جاری کر دیے۔

بعد ازاں عدالت نے سماعت کو 15 دسمبر تک ملتوی کر دیا، اور عدالتی کارروائی ملتوی ہونے کے بعد علیمہ خان اپنے وکیل کے ہمراہ عدالت میں پیش ہوئیں۔