کراچی: سونے کی عالمی اور مقامی مارکیٹوں میں قیمت آج مزید بڑھ گئی ہے۔ بین الاقوامی مارکیٹ میں فی اونس سونے کی قیمت 27 ڈالر کے اضافے کے بعد 4,245 ڈالر تک پہنچ گئی، جس کے اثرات مقامی مارکیٹوں میں بھی دیکھے گئے۔

مقامی صرافہ مارکیٹ میں 24 قیراط فی تولہ سونے کی قیمت 2,700 روپے کے اضافے سے 4,46,862 روپے تک پہنچ گئی۔ اسی طرح فی 10 گرام سونے کی قیمت 2,315 روپے بڑھ کر 3,82,112 روپے ہو گئی۔

چاندی کی قیمت میں بھی اضافہ دیکھنے میں آیا، فی تولہ چاندی کی قیمت 54 روپے بڑھ کر 5,963 روپے اور فی 10 گرام چاندی کی قیمت 46 روپے اضافے کے ساتھ 5,112 روپے تک جا پہنچی۔

ماہرین کا کہنا ہے کہ عالمی مارکیٹ میں سونے کی قیمتوں میں اضافہ اور ڈالر کے مقابلے میں روپے کی قدر میں اتار چڑھاؤ سونے اور چاندی کی مقامی قیمتوں میں اضافے کی بنیادی وجوہات ہیں۔ سرمایہ کاروں کو محتاط رہنے کی ہدایت کی گئی ہے۔